گلمدین

گوز یاشیم آرخانجا آخدی اُلدی دریا گلمدین

سویله دیم سن سیز منه زینداندی دونیا گلمدین

شعله ی عشقینده من پروانه اُلدوم بیر گئجه

یاندی کونلوم بس نیه بهر تماشا گلمدین؟

یادیمه دوشدو بیر آن سنله او گئچمیش گونلریم

دولدی سن سیز باغریما حسرتلر آمّا گلمدین

ایستدیم سندن یازام گوردوم قلمده آغلادی

آغلادیخ منله قلم یازدیم سونوندا گلمدین

من اولورسم قبریده کونلوم آنار هر دم سنی

گوزلریم هر گون سنین قالدی یولوندا گلمدین

سون نفسده منصورون واردیر سنه بیر جومله سی

چوخ سنی یاد ایله دیم آمّا نه فایدا گلمدین