بیر باخیش

بیر باخیشلا منی سن زار و پریشان ائله دین

عاشیقین اولدوم آما قلبیمی ویران ائله دین

عالمه اولموشودوم شهره سنی سئومگیله

بی وفالیخلا بوتون دونیانی حیران ائله دین

جان بهاسینه سنین عشقیوی آلمیشدیم آما

بیلمدین قدریمی سن عشقی چوخ ارزان ائله دین

عمرومی دونیامی عشقین یولونا گویموشدوم

گئتمه یین له نه گوزل هر شی یی جبران ائله دین

اویله بیر درس محبت له وفا وئردین کی

((منصور))ی عاشیق اولوب سئومگه پشمان ائله دین